JOHAN THAWNGTHA RELNAK

JOHAN THAWNGTHA RELNAK

A tialtu:

Hmadung bik ah chiahmi Johan tialning Thawngtha - a tialtu hi "Jesuh nih a dawtmi Lamkaltu" tiah Cathiang lila ah (21:20-24) kan hmuhmi Johan a si. Hi lamkaltu Johan hi Zebedi fapa, Jeim naupa a si. Amah hi Judah mi nih an nautat ngaimi Galili mi a si. Marka 3:17 ah "Khuari fapa" tiah ti a si. Jerusalem i Kawhhran a dirka ah khan a biapi ngaimi dirhmun ah a rak dirmi zong a si. Hnu deuh ah Efesa ah a kal i a ruang hngalh loin Patmos tikulh ah thong ah thlak a si (Biathlam 1:9).

A Tialnak Hmun le Caan:

Thawngtha pali lakah hmadung bik ah chiahmi Johan tialning Thawngtha hi a tial caan zong a dang pathum hna lakah hmadung bik a si. Cheukhat hna nih cun kum zabu pahnihnak laifa (130-150 AD) hrawng ah tialmi a si lai tiah an ruah. Asinain, Jerusalem in Efesa ah a kal i Patmos tikulh ah thong i a tlak hlan deuh ah hi Thawngtha hi Johan nih Efesa ah AD 85-90 karlak ah a tialmi a si ti hi mi tam bik pommi le zumhmi a si.

A Tialchan:

Penticos ni ah Thiang Thlarau a ra i mit i hmuh khawhmi Kawhhran a dir tikah pal phun hnih a ngai colh i cucu lenglei ral le chunglei ral tiah min bunh a si. Hmuh khawh mi an mipum thah i hlohdih a timtu kha lenglei ral timi cu a si. Asinain, lenglei ral nih Kawhhran a hrawk bal lo. Mithmuh khawh lomi cawnpiaknak hmanlo hi chunglei ral timi a si. Cucu Kawhhran rawhtertu bik a si. Midang pathum, Mattai, Marka le Luka nih an tial hnu chan khat dengmang ah hi Johan tialning Thawngtha tial than a si chan bik hi Kawhhran chunglei ral cawnpiaknak hmanlo chungin i kilvennak ah tialmi a si. Kawhhran chunglei ral cawnpiaknak hmanlo hi phun hnih a rak si. Pakhatnak cu Judaizer ti a si i nawlbia le zangfahnak fonh a timtu an si. Pahnihnak cu Gnostic ti a si i Johan nih doh a timhmi cu Gnostic hi a si. Zeicatiah Gnostic nih cun mit in hmuhmi le kut in tonghmi le hna in theihmi vialte hi sual a si an ti tikah Jesuh Khrih zong misual a si a herh. Zeicatiah an mit in an rak hmuh, an in kut in an rak tongh i a chimmi kha an hna in an rak theih.

Cucaah, hi Johan Thawngtha le cakuat Johan hi a tialchan bik cu, "A hramthok in van ah a rak um cangmi Bia Titsa ah a cang i mit in an hmuh i kut in an tongh i hna in an theihmi kha Pathian Fapa, vawlei misual Khamhtu Nunnak hrampi a si" ti kha a hramthok in a dongh tiang langhter a timhmi a kawltung a si, Johan 1:1, 14; 1 Johan 1:1, 5:7.

Johan Thawngtha nih hin Jesuh cu zungzal in a ummi Bia, Pathian Bia a si tiin a chim i "cu bia cu minung ah a cang i kan lakah khua a sa" a ti. A cauk nih a chim bantuk hin, hi Thawngtha cu, Jesuh cu kamh ciami Khamhtu, Pathian Fapa a si kha mi nih an zumh khawh nakhnga le amah an zumhnak thawngin nunnak an hmuh khawh nakhnga caah, tial a si.

Biahmaithi ah Jesuh cu Pathian Bia a si ti kha a langhter hnuah, Jesuh cu Pathian Fapa a si i kamh ciami Khamhtu a sinak kha khuaruahhar a tuahmi nih an langhter tiin a tial. Cun cu khuaruahhar nih an langhtermi cu bia in an sullam kha a fianter hna. Cun mi a cheu nih Jesuh bia an zumh i a zultu ah an i can i a cheu nih an zumh duh lo i an dohnak kong kha kan hmuh fawn. Dal 13 in 17 tiangah hin Jesuh le a zultu pawl hna an i hawikomhnak kong, an tlaih zan thil umtuning kong le vailamtahnak a in lainak kong i hnangamnak bia a chimhmi hna kong kkha kan hmuh. Cu hnuah cun Jesuh an tlaihnak kong, bia an ceihnak kong, an thahnak kong, a thawhthannak kong le a zultu hna sin i a langhnak kong kha kan hmuh hna.

Dal 8:1-11 chung i a sual minu kong aa tialmi hi bereket chungah chiah a si, zeicatiah kut in tialmi ca a cheu chungah hi kong hi a um lo. Asinain a cheu chungah cun a um ve ko.

Johan nih hin Khrih thawngin zungzal nunnak hmuhmi, atu in aa thokmi nunnak, Jesuh cu lam le biatak le nunnak a si tiin a cohlang mi hna nih an hmuhmi nunnak kha biapi ngaingai in a hler. Cun Johan chimning le hawi dang bia chimning an i dannak cu Johan nih cun nifate kan hmuh kan tonmi thil hmete chung i thlarau biatak a hmuh khawh hi a si, tahchunhnak ah ti hei ti tehna, changreu hei ti tehna, ceunak hei ti tehna, tuu le tuukhal hei ti tehna, misur ruang le thei hei ti tehna hi an si.

Dr. Rual Uk nih Johan Thawngtha a rel mi cu Jesuh tuanbia an cuanter mi Movie he pehtonh in kan i fiang khawh deuh nak dingah chiahmi a si. Hi thil a tlamtlin khawhnak dingah rian tuantu vialte nan cungah kan i lawm. Bawipa tu nih thluachuahnak in pe chin hna sehlaw a sunparnak caah in hmang chin ko hna seh.