Matthai Thawngtha Relnak

Matthai Thawngtha Relnak

A Tialtu:

Levi tiah kawhmi Alfaeus fapa Matthai hi Rom cozah tangah ngankhuai a khawltu Judah mi a si. rom cozah he an i pehtlaih ruangah Matthai le a riantuanpi hawi hna cu Judah mi nih an huat i an zomhtaih ngai ngaimi an si. Asinain, tluangtlam te i Jesuh kawhnak kha let in a zulh hnu ah Lamkaltu timi chungah khumhmi a si. Kum thum reng lo a zulh hnu ah a zulhmi Jesuh Khrih kong Thawngtha tialtu pakhat ah a cang.

A Tialnak Hmun le Caan:

Matthai tialning Thawngtha hi a caancaan ah AD 80 asiloah 90 hrawngah tialmi ah ruah sihmanhsehlaw AD 70 ah hrawh a simi Jerusalem kong kha hmailei ah a tlung laimi ah (Matt. 24:2) chiah a si caah cunaak tuan deuh ah tialmi a si a herh. Cheukhat nih Thawngtha pali lakah hmasa bik (AD 50 hrawngah) tialmi bangin an ruah, asinain cheukhat nih a hmsa bik ah tialmi bang i ruat loin AD 60 hrawngah Judia ram ah tialmi ah an ruah.

A Tialchan:

Matthai tialmi Thawngtha hi an rak hngah zungzal mi an Messiah ka si tiah a titu Nazaret Jesuh kongah an hal lengmang mi bia lehnak dingah Judah mi hna sinah tialmi a si. Biakam Hlun nih a rak phuan lengmang mi vanbawi pennak a dirhtu ding, David fapa cu amah hrimhrim hi a si, ti hi Matthai nih a hmaithlak bikmi a Thawngtha chungah muru cu a si. Cucaah "a bia-meilah cu, tiah tialmi Cathiang kha a tling" ti hi a si. Cun Thawngtha tialtu pathum hna nih an hman lomi amah lawng i a hmanmi biafang cu, "Khrihfabu" (Church) timi hi a si.